(1891) Glorias de Asturias

"Si Astúries ye 'l xardin, al que gociósu,
baxa de temporada Dios bondósu
y mas que 'l sol resplándia por so Historia
¿de qué glories falar, si todo é gloria?"

¡Astúries de mió amor!... ¡Xoya brillante!...
por muncho bien que cante
el mas tienru mortal, faráte agráviu:
pa rellatar tos glories pelegrines
al son d' árpes devines,
barrunto é menester devinu llábiu.

¿Ónde la llira 'stá, que so dolzura
llegar sépia á l' altura
ú s'afayen con Díos sábios sin cuentu?
¿Ónde 'l cantor?... Que salga el mas preciadu
y á la postre, amusgadu,
frañirá 'n mil estielles 'l esturmientu.

Non basta tener fuelgu, y animósu,
con son estrepitósu
les fazañes cantar de mil varones...
si 'l alma non allenta el sácru fuegu,
la llira, pol llaviegu
debe trocar dexando les canciones.

¡Non basta, mialma, non!... Tanta grandeza,
talentu, fé y pureza
ablúca, 'l recordallo, al mas valiente:
el q' al sol mira 'n tientes, lluego ciega...
y el géniu, ¿quién lo niega?
¿quiciás non ye útru sol tan resplandiente?

Hay veces que 'l Siñor (benditu sea)
en prebar, se recrea,
so enfenitu poder á los humanos,
y entóncenes la tierra se illumina
co la llabor devina
sortiendo portentósu un Xovellanos.

Gozos, triunfos, llacéries, traidoríes
pesares ó alegríes,
saborgaron, siguiendo réutu 'l vuelu...
y na Iglesia nel Foru ó la Melicia,
llograron, con xosticia,
fama eterna los fíos d'ísti suelu.

Yo bien sé q' al par d'illos soy un llixu;
pero prúyeme 'l rixu
de féyos agasáyu 'n isti día;
más d' un borrón faré, si Dios bondósu,
como-i lo pido, ansiósu,
en trabayu tan nídiu non me guía.

Entamo la canción... "Virgen hermosa,
santina milagrosa,
que reines del Astur en 'a memoria;

perla de Covadonga, capitana,
de la xente asturiana,
Tú, por siempre, serás so mayor gloria."

Nel peñón, ú t' afayes vixilante,
á Pelayo triunfante,
viesti de la feroz plaga moruna;
Tú añeráste 'n so alma fuelgu y bríu,
y al nóme del to fíu
esfarrapada fó la media lluna.

Siete siglos dimpués, en Tí enfotada,
Isabel, en Granada,
arrastrar al infiel fexo 'l grillete;
y el Darro se tiñó con sangre mora,
como roxu, en mal' hora,
corrió co la cristiana el Guadalete.

Y hoy tovía, si aporta, esos llebreles,
estocinen ¡crueles!
al que 'l símbolu adora del cristianu...
¿Morrió con Isabel la fé y coraxe?
¿Por qué de tant' ultraxe
xusta cuenta non rinde 'l africanu?

En nóme de Mahoma, á berganazos,
frayáos los costazos,
dexen á los q' atrapen ¡qué bribones!
pos yo 'n so mesma tierra i-os diría:
en nóme de María
nin costielles vos dexo nin riñones.

¿Pero, viésteis? - ¿Non troco pe 'l atayu,
cual fixés un babayu,
el camin rial espuestu á una boriada?
Perdonáime... ya firme nel senderu,
seguiré placenteru
fasta llegar al fin de la xornada.

"Princesina d' Asturies, "fresca rosa,
que 'n to frente llustrosa
la siñorial diadema pura brilla,
Dios te fáiga feliz, y atendi agora,
pos amesto, Siñora,
la relación de tanta maravilla.

Brillantes de igual pesu y hermosura,
ingeniu y galanura,
foron los q' algamaron xusta gloria;
y anq' algún s' escaeza 'l rellatáillos,
lluego podréis topallos
en lletres d' oro, si miráis la Historia.

Un llibru poco fós' pal historiadu
que, sábiu, xustu, honradu,
agasayár Asturies hoy desea:
al escuchar un nóme, reverentes,
abaxémos les frentes
diciendo con amor, "benditu sea."

Pos bendígote, Antón Mari-Reguera,
que na fabla melguera,
q' emplega el paxarin, llamando á ñeru,
nel bable cadenciosu, mil cantares,
q' escuerren los pesares,
dexáste pa solaz del pueblu enteru.

Yo quixe 'l rinconcín ver por miós güeyos
ú dances y trebeyos
pintaste como naide 'n tantu escritu;
y á lo en pruno subí de Llogrezana
oyendo, na quintana,
to nome bendicir á voz en gritu.

"Caveda..." al recordáte, 'l alma mía,
reblinca d' alegría
na cárcel ú s' afaya prisionera...
¿el llantu d' una madre, so tenrura
añando á la cretura,
como tú lo fixiste quien fixera?

Benditu, sábiu illustre, q' amorósu,
homilde y bondadósu,
de quien viésti xemir fósti consuelu;
llegó al alto to fama, y ési día,
escurro, Dios diría,
"mas falta que 'n Xixón, fáila nel cielu."

A Xuan María Acebal, quiciá el primeru
que 'n el bable parleru
maestro merez ser, ¿cóm' olvidara?
¿Cantar y más cantar, non yé un edíliu
tan ricu, que Vergiliu,
muy arrechu, por suyu lu firmara?

"Campoamor..." batíi palmes, anxelinos...
¿de sos versos devinos,
non gociásteis xamás el embelésu?
¡Qué llástima me dais!... Sin perder hora,
baxái po la dolora
"¡Quién sopies' escrebir, y El tren esprésu!

Darévoslo gustósu, pero 'n troque,
llográi que nunca toque
la güestia esgargolada á tal xigante;
anque, si bien se mira, con mas brillu,
lu dexará 'l ferillu,
pos sin barro mas lluz vierte 'l diamante.

Cunto facer un ramu, co les flores,
mas chúsques en colores
que brotaron d' Astúries 'nos xardines;
ya viésteis los claveles... pos mió intentu,
yé 'nllazar, nun momentu,
con aquellos, les fresques clavelines.

Pepina Xovellanos... tan graciosa,
como dulce, amorosa,
pa consolar al q' aflixíen penes;
escrebiendo la gracia trasvertía,
y á los probes dicía
"solo pa facer bien quiero los bienes".

Micaela de Silva fó una xana;
dinguna, más galana,
del Parnasu 'l camín trió arrogante...
dos flores más, y ródio al ramu'l filu:
Dosinda, la de Silu
y Aldonzina Muñoz... ¡ramu xoyante!...

Agora paso llista á los de guerra.
Los fíos d'ista tierra,
de la patria 'l honor, troca en lleones...
y á querer alfomár les carreteres,
sobrárenmos banderes
ganáes con coraxe a útres naciones.

So Excelencia, el siñor de Marcenadu;
sábiu illustre, y soldadu,
q' á Marte dexó atrás en 'a bravura;
mal feridu 'n Orán, morrió matando,
y el que vivió guerriando
en' a guerra topó la sepoltura.

Cúnten, q' un día, dió en fender molleres,
y toches, les muyeres
glayaben en so llengua ¡abast' abasta!
y cuando, fechos liebres, s' esmucíen
los contrarios dicíen:
¡diablu de Santa Cruz! ¡que fumos gasta!...

Carreño, San Miguel, Riego, Quiñones,
Sierra y tantos varones,
q' al escurecieron con so gloria,
retueyos son del pueblu, q' ísti día,
per llocu d' alegría,
himnos canta d'amor a so memoria.

Y tamién hoy bendiz á los astúres
que nos valles y altures
fixeron recular al extranxer;
nísti suelu adoradu, quien lu ultraxa,
alcuentra la mortaxa,
pos fiere como 'l rayu 'l guerrilleru.

Quixo Napoleón, ¡qué babayada!
esta tierra sagrada
sotripar con sos fuerces y mandones...
poco los de San Lluis foron ganando,
pos los de San Fernando,
homes esguedeyaron y pendones.

Como 'l raposu, que s' esnídia arteru
dientro del gallineru
y taragaños á mamplén reparte,
ansí fexo 'l francés; mas tal fazaña,
pagó cara 'n España...
¡á bona parte vieno Bonaparte!

Nunca 'n valdre 'l clarín llamó á sos fíos;
valientes y sofríos,
ú quier so enseña va, cuerren ufanos;
nin la fame ó la sede los encueye,
nin el orbayu tueye
los góznios de los récios asturianos.

Rellatando sos fechos, increíbles,
Suetónio, de invencibles
los aclama la Historia... véi 'l escritu;
Páulo-Emilio, tamién, y Xuan el Manu,
en cad' un vé un milanu
qu' esnala po la gloria 'l enfenitu.

Nin Munuzas, nin diablos coronáos,
Tarifs, y útros malváos,
foron quien á metemos en centura...
-¿Hay peñes q' argayar - Q' artillería,
mas destrozu faría
que piedra, á un tíempu bála y sepoltura?

Rexistrái les batalles más nombráes,
ú freches ó llanzáes
los cuerpos furacaron y de fixo
astures toparéis, por so costancia,
siendo plasmu 'n Numancia,
Caltañazor, les Naves y Clavixo.

Tá un pleitu, por fallar, s' afaya hoy día;
hay quien diz, qu' en Pavía,
quien fexo al rey Francisco prisioneru,
fó un mozu de Piloña, llebrel finu,
anq' utru mas lladinu;
el fechu s' aprepió, gloria y dineru.

De Covadonga el batallón famosu;
el non menos gloriosu
reximentu d' Asturies aguerridu,
y cuantos po la patria secumbieron,
viven anque morrieron,
pos nunca España los dará 'l olvidu.

¡Xardin encantador!... ¡Benditu suelu!...
ñeru 'n que Dios del cielu
la riqueza semó, dicha y encantu;
viveru de vertudes, en fé brilla,
y non ye maravilla
cuntar ente sos fíos algún santu.

Bien sabeis, que Tuc-duc, fechu 'n venenu,
y de coraxe llenu
desfrebó 'nel Tung-King á un quirosanu;
¡al beatu Melchor!... mártil valiente,
que llogró, dilixente,
facer de cada idólatre un cristianu.

Y ónde 'l diañu reinára, vés' agora,
na mas risca l' aurora
¡la Cruz, enfótu nostru y alegría!...
y homildicos ant' ella, les frentes,
bendicen á Melchor, que fó so guía.

Baxo 'l pálio sagradu, la grandeza
lluciendo del Cabeza
de la Iglesia de Cristo poderosu,
Inguanzos y Valdeses, son llumbreres
quiciáes les primeres,
gloria del pueblu astur, siempre piadósu.

Ú la tierra s' afaya bien llabrada
segura ye l' añada,
y ansí pasa á ísti suelu idolatrau;
el Cardenal González, que 'na céncia
algamó la eminencia,
retueyu ye d' Asturies muy preciau.

-¿De quién falar agora?... ¡Virgen Santa!
ablúcame y espanta
tan llerciósa llabor... ¡ay, desdichadu!
si todos nel resplándiu son lluceros,
segundos y primeros,
deben gociar de gloria 'n igual gradu.

-¿Per ú salgo, Siñor?... Ya topé puntu,
y mialma, que 'l asuntu
á saber desñudalu ye per bonu;
tres perendengues tien pe lo prefundo,
pos trátase d'un mundo
q' ofrez un xinovés de tronu 'n tronu.

¡Colón!... que cinco lletres! cada una,
más rellúz que la lluna
cuando entama so ronda pe l' altura;
y á pecao non ser, fasta xurara
que Dios mesmu tomara
de Critobal, el nóme y la fegura.

Tan xigantesca y lloca ven so idea,
que non hay quien lu crea
y d' aquí p' acullá cuerre doliosu;
quixo explicar el quid á los dotores,
y entós, esos siñores,
llamáronlu borricu y mentirósu.

"E pur se muove... dixo, según creo,
el sábiu Galileo,
que prebaba les güeltes del planeta;
"allantrón de la mar, tierra s' afaya,"
ripite, y lu atristaya
el nón d' aquellos homes sin chapeta.

-¿Cuidáis que non tien fin? - Fora llocural
siendo de Dios fechura
lo impreféuto non cabe..., ¡desvaríu!...
Orilles tien... por eso xime y ruxe,
mas dimpués del empuxe
¿qué queda fechu 'l mar? ¡Un gan vedríu!

Alfonso Quintanilla, sábiu, honradu,
de llealtá dechadu,
astúr de nacimientu y poderosu
pos yera de la Corte 'l conseyeru,
el plan del extranxeru
tan faible miró como gloriosu.

Entós díxo á Isabel: "Solo to alteza
ver claro, la grandez,
puede d' ísti proyeutu sobrehumanu!...
vencíu Boabdil, sin reinu llora;
pos bono, fai agora,
que 'l sol nunca se ñuble 'n suelu hispanu. "

Cuando un home, que tien bona mollera,
alcuentra compañera
en 'a d' utru, les dos facen proéces;
en sos frentes la lluz del géniu brilla...
Colón y Quintanilla
miánica yeren dos bones cabeces.

La Católica reina, xenerosa
pa empresa tan gloriosa,
sos alhaxes trocó por carabeles...
y el lleón de Castiella, ruxió fieru
en un nuevu hemisferu
algamando los tres xustos lloreles.

Si Argüelles, el Devinu, acá golviera
y el rellatu fixera
de la gloria inmortal de sos paísanos,
en ijujús la xente rompería
y escurro non daría
vagar en munches hores á sos manos.

"Derramaba 'l falar tanta dolzura;
yera tal la llocura,
y tan grande al oillu 'l embelésu,
q' una vez nun descursu pelegrinu,
llamándolu devinu
á sos plantes cayó todu 'l Congresu"

Florez Estrada, Mon, Xuan Llorenzana,
que so pluma galana
berbenaba de perles los ringlones...
Canella, Siñeriz, Posada Herrera,
Acevedo y Perera,
aumentaron d' Asturies los florones.

Pedro José Pidal, de bona mena,
reviviendo á Baena,
llustre aporta á les lletres españoles;
Cean Bermudez, Toreno, Campomanes,
y mil d' éstes quintanes,
sábios son, que rellumen como soles.

Al modu que nun ramu bien iguáu
el xazmín, tan preciáu,
de rey fai, escollando ente les flores,
dexáime q' al finar tan rica historia
á les glories, dé gloria,
quien l' algamó mayor, que los meyores.

¡Xovellanos!... entrái pe los xardines,
xentiles rapacines,
y apelucái fasta cargar de roses;
facéi corones d'elles y en so frente,
que vos mire la xente
posar les que texísteis mas precioses.

Xixoniegu inmortal, que 'l mundo aclama,
y portentu te llama,
pos móstru fosti nel saber humanu;
si cien veces, nacer, Dios me dexara,
tantes i-soplicara
la gloria de llamate mio paisanu.

Tú diesti al llabrador sábios conseyos,
y sin piesllar los güeyos,
t' afanasti 'n facer dichosa á España;
hoy la pátria premiar quier to talentu,
y alegre, lleva el vientu,
to nome de lo llano á la montaña.

¡Estáuta te llevanten!... ¡tan ufanos!...
los bonos asturianos,
más ricu menumentu t' ofrecemos;
nel alma de cad' un, bien allugadu,
Gaspar idolatradu,
un altarín pa tí llevantaremos.

Reparái un filómenu asombrosu:
el sol explendorosu,
al nomar á Xovín menos resplande...
y anq' allumar el mundo ye s' oficiu,
reconóz, que 'l patriciu,
ástru ye de más brillu... sol más grande.

Aquí, la mió canción, na mas allega;
ya vos dixe que ciega
quien s' estela nel sol, y ansí prudente,
antes que tanta lluz ñuble la mia,
dexo la poesía
ripitiendo mió xuiciu reverente:

"¡Asturies de mió amor!... ¡Xoya brillante!...
por muncho bien que cante
el mas tienru mortal, faráte agraviu!...
pa rellatar tos glories pelegrines,
al son d'arpes devines,
barrunto é menester devinu llábiu.